8 maydan 9 mayga o‘tar kechasi Samarqand shahrining "Bog‘isaroy" mahallasi, Spitamen ko‘chasida joylashgan ko‘p qavatli uyda qo‘rqinchli hodisa — gaz-havo aralashmasining chaqnashi sodir bo‘ldi. Bu haqda Favqulodda vaziyatlar vazirligi matbuot xizmati ma’lum qildi.
Qutqaruvchilar tezkorlik bilan joyga yetib bordi
Chaqnash to‘g‘risidagi xabarni olgan yong‘in-qutqaruv guruhlari darhol voqea joyiga yetib borib, falokat oqibatlarini bartaraf etish ishlariga kirishdi. Hodisa sodir bo‘lgan uyning temir-beton konstruksiyalari kinetik zarba tufayli vayron bo‘lgan.
Shu sababli binoning 1, 2 va 3-qavatlari, shuningdek, yerto‘la qismi jiddiy shikastlangan. Hodisa chog‘ida yong‘in sodir bo‘lmagani qayd etilmoqda.
6 nafar fuqaro qurbon bo‘ldi
Qidiruv-qutqaruv ishlari davomida vayrona ostida 6 nafar fuqaroning jasadi topilgani ma’lum qilindi. Hozircha halok bo‘lganlarning shaxsi haqida rasmiy ma’lumot berilmagan.
Hukumat xizmatlari ishtirokida shtab tuzildi
Hodisa oqibatlarini bartaraf etish maqsadida Samarqand viloyati FVB boshlig‘i rahbarligida tezkor shtab tashkil etildi. Shtab tarkibiga quyidagi tashkilotlar jalb etilgan:
- Prokuratura organlari;
- Ichki ishlar boshqarmasi;
- Milliy gvardiya;
- Sog‘liqni saqlash bo‘limi;
- “Hududgazta’minot”;
- Mahalliy hokimlik va FVDT xizmatlari.
Joyda 10 ta maxsus texnika va yong‘in-qutqaruv vositalari bilan avariya-qutqaruv ishlari olib borilmoqda. Vayronalar ostidan tirik qolganlarni izlash hamda xavfli jismlarni olib tashlash ishlari davom etmoqda.
Tergovoldi surishtiruv boshlandi
FVV ma’lum qilishicha, hozirda ushbu holat yuzasidan dastlabki tergovoldi tekshiruv ishlari olib borilmoqda. Gaz chiqishi va chaqnashga nimalar sabab bo‘lgani hozircha noma’lum. Mutaxassislar hodisa yuzasidan texnik xulosalar tayyorlamoqda.
Zamin.uz tahririyati halok bo‘lganlarning yaqinlariga chuqur hamdardlik bildiradi va bu kabi fojialarning oldini olish uchun barcha tegishli idoralarning mas’uliyati yanada oshirilishi kerakligini ta’kidlaydi.
